Lam 2 | NdeIBE | STEP | UJehova useyembese iNdodakazi yeZiyoni ngeyezi lolaka lwakhe! Ubutaklazele phansi ubunkanyankanya buka-Israyeli busuka ezulwini busiya emhlabeni; kanakanga isinyathelo sakhe sesihlalo mhla wentukuthelo yakhe.

Lamentations 2

1 UJehova useyembese iNdodakazi yeZiyoni ngeyezi lolaka lwakhe! Ubutaklazele phansi ubunkanyankanya buka-Israyeli busuka ezulwini busiya emhlabeni; kanakanga isinyathelo sakhe sesihlalo mhla wentukuthelo yakhe.

2 UJehova kabanga lozwelo lapho eginya yonke imizi kaJakhobe; ngolaka lwakhe udilizele phansi izinqaba zeNdodakazi kaJuda. Usewuchithile umbuso wakhe lababusi bakhe wababhuqa phansi baba lehlazo.

3 Ngolaka lwakhe olwesabekayo usegumule zonke izimpondo zika-Israyeli. Usegodle isandla sakhe sokunene lapho kuqhamuka isitha. Utshisile koJakhobe njengomlilo welangabi elihangula konke okuseduze.

4 Njengesitha uselinwebile idandila lakhe; isandla sakhe sokunene sesilungile. Njengesitha usebabulele bonke ababethokozisa emehlweni; usethele ulaka lwakhe olungumlilo phezu kwethente leNdodakazi yeZiyoni.

5 UJehova unjengesitha; usemginyile u-Israyeli. Useziginyile zonke izigodlo zakhe wabhidliza zonke izinqaba zakhe. Usekwandisile ukukhala lokulilela iNdodakazi kaJuda.

6 Usetshaye wakhukhula umuzi wakhe njengensimu; usebhidlize indawo yakhe yokuhlanganela. UJehova usenze iZiyoni yakhohlwa imikhosi emisiweyo yakhe lamaSabatha ayo; olakeni lwakhe olwesabekayo ukhukhulele khatshana oyinkosi longumphristi.

7 UJehova uselikhalele i-alithare lakhe wafulathela indlu yakhe engcwele. Useqhubele esitheni imithangala yezigodlo zakhe; seziklabalala endlini kaJehova kungathi lilanga lomkhosi omisiweyo.

8 UJehova wazimisela ukudilizela phansi umthangala ohonqolozele iNdodakazi yeZiyoni. Welula intambo yesilinganiso sakhe akaze agodla isandla sakhe esibhidlizayo. Wenza izinsika lemithangala kwalila; kanyekanye kwasobela.

9 Amasango akhe asegqibelekile; izinti zawo zephuliwe zabhidlizwa. Inkosi yayo lamakhosana ayo achithizwe kwabezizwe, umthetho kawusekho, labaphrofethi bakhe kabasayamukeli imibono evela kuJehova.

10 Abadala abeNdodakazi yeZiyoni bahlezi emhlabathini bathule zwi; bazivuvuzele ngothuli emakhanda abo bazembathisa amasaka. Izintombi zaseJerusalema zimbele amakhanda azo phansi.

11 Amehlo ami ayehluleka ngokukhala, ngiyatsha ngaphakathi kwami, inhliziyo yami idabukile ngokuba abantu bakithi babhujisiwe, ngokuba abantwana lezinsane ziyaqaleka emigwaqweni yomuzi.

12 Zithi kubonina, “Singaphi isinkwa lewayini?” zilokhu ziqaleka njengamadoda alimeleyo emigwaqweni yomuzi, ziphela umphefumulo ezandleni zabonina.

13 Kambe ngingathini kuwe na? Ngingakulinganisa lani, we Ndodakazi yaseJerusalema? Kambe ngingakufanisa lani ukuze ngikududuze, wena Ndodakazi eMsulwa yaseZiyoni? Inxeba lakho liyatshona njengolwandle. Ngubani ongakwelapha na?

14 Imibono yabaphrofethi bakho yayikhohlisa ingasizi lutho; kabasivezanga obala isono sakho ukuze ungehlelwa yikuthunjwa. Ukuvumisa abalenzela khona kwakungamanga kulikhohlisa.

15 Bonke abedlula eceleni kwakho batshaya izandla ngawe; bayakuhleka baze banikine amakhanda ngeNdodakazi yaseJerusalema: “Kambe yiwo yini umuzi lo owawuthiwa yibuhle obupheleleyo, igugu lomhlaba wonke jikelele?”

16 Zonke izitha zakho zikukhamisele imilomo; ziyakuhleka zikugedlela amazinyo zisithi, “Sesinqobile. Selize lafika ilanga esasililindele; selize lasifica sisaphila.”

17 UJehova usekwenzile ayekuhlosile; useligcwalisile ilizwi lakhe, alazisayo kudala. Ukuwisile engakuzweli usizi, uvumele isitha santela phezu kwakho, uluphakamisile uphondo lwezitha zakho.

18 Izinhliziyo zabantu ziyakhala eNkosini. Awu, mthangala weNdodakazi yaseZiyoni, kazigeleze izinyembezi zakho njengomfula imini lobusuku; ungaziphi ikhefu, lamehlo akho ungawaphi ukuphumula.

19 Phakama, nqongoloza ebusuku, lapho kuqalisa imilindo yebusuku; thulula inhliziyo yakho njengamanzi phambi kukaJehova. Phakamisela izandla zakho kuye uncengela impilo yabantwabakho, abaqalekiswa yindlala ekuqaliseni kwemigwaqo yonke.

20 “Ake ukhangele, O Jehova, ube lozwelo: Ngubani osewake wamphatha kanje? Abesifazana badle inzalo yabo yini, abantwana ababondlileyo na? Umphristi lomphrofethi babulawe yini endlini engcwele kaJehova?

21 “Abatsha labadala badandalazile ndawonye ebhuqwini, emigwaqweni; izinsizwa zami lezintombi ziwile ngenkemba. Ubabulele ngosuku lokuthukuthela kwakho; awaze waba lesihawu lapho ubabulala.

22 “Njengokunxusela ilanga lomkhosi, wanginxusela izitha inxa zonke. Ngosuku lolaka lukaJehova kakho owaphunyukayo loba owasilayo; labo engangibanakekela engabondlayo isitha sami sibabulele.”